இந்திய ஒன்றிய துணை அமைச்சர் திரு வி. கே.சிங் அவர்களுடன் சந்திப்பு

உளுந்தூர்பேட்டை மற்றும் திருமாந்துறை டோல்கேட்களில் வேலை நீக்கம் செய்யப்பட்ட ஊழியர்கள் 56 பேரை மீண்டும் பணியில் சேர்க்க வலியுறுத்தி இந்திய ஒன்றிய துணை அமைச்சர் திரு வி. கே.சிங் அவர்களிடம் தலைவர் எழுச்சித் தமிழர் அவர்களும் நானும் தனித்தனியே மனு கொடுத்தோம். அதுகுறித்து விளக்கமாக எடுத்துக்கூறினோம். நிச்சயம் நடவடிக்கை எடுப்பதாக அமைச்சர் உறுதியளித்தார்.

மனுவில் உள்ள விவரம் பின் வருமாறு :

தமிழகத்தில் தேசிய நெடுஞ்சாலைகளில் 48 சுங்கச்சாவடிகள் இயங்கி வருகின்றன. இந்த சுங்கச்சாவடிகள் இந்திய தேசிய நெடுஞ்சாலை ஆணையத்தால் (NHAI) 27 திட்டங்களாகப் பிரிக்கப்பட்டு கார்ப்பரேட் நிறுவனங்களுக்கு ஒப்பந்தத்தில் விடப்பட்டுள்ளன. ஒப்பந்தம் எடுத்துள்ள நிறுவனங்கள் அவுட்சோர்சிங் முறையில் டோல் பிளாசாக்களை துணை ஒப்பந்தம் செய்துள்ளன.

இந்த சுங்கச்சாவடிகளில் 10 முதல் 15 ஆண்டுகளாக தொடர்ந்து பணிபுரியும் தொழிலாளர்கள், நாடு முழுவதும் அறிமுகப்படுத்தப்பட்ட தானியங்கி கட்டண வசூல் தொழில்நுட்பத்தைப் பயன்படுத்தி சட்டவிரோதமாக பணிநீக்கம் செய்யப்பட்டுள்ளனர். கள்ளக்குறிச்சி மாவட்டம் செங்குறிச்சி, பெரம்பலூர் மாவட்டம் திருமாந்துறை ஆகிய இடங்களில் உள்ள சுங்கச்சாவடிகளில் சட்டவிரோதமாக 56 ஊழியர்கள் பணி நீக்கம் செய்யப்பட்டுள்ளனர்.

உதவி தொழிலாளர் ஆணையர் உத்தரவிலும்(எண் 8/20/2022/PDY Dt 12.09.2022) மற்றும் RDO, திருக்கோவிலூர் Dt 20.102022 க்கு முன்பு நடந்த சமாதானக் கூட்டத்தில் எட்டப்பட்ட ஒப்பந்தத்திலும், தொழிலாளர்களை பணிநீக்கம் செய்யக்கூடாது என்றும், தற்போதுள்ள நிலையே தொடர வேண்டும் என்றும் உடன்பாடு ஏற்பட்டது. இருந்தபோதிலும் M/s SKM கான்ட்ராக்டர் & சர்வீசஸ் பிரைவேட் லிமிடெட் மற்றும் M/s திருச்சி டோல்வே பிரைவேட் லிமிடெட் ஆகியவற்றால் பணிநீக்கம் செய்யப்பட்டுள்ளனர்.

பணிநீக்கம் செய்யப்பட்ட தொழிலாளர்கள் குடும்பத்துடன் தொடர்ந்து போராடி வருகின்றனர். இதனால் மாநிலத்தில் சட்டம் ஒழுங்கு பிரச்சினையும், அரசியல் குழப்பமும் ஏற்பட்டு வருகிறது. எனவே, மாண்புமிகு அமைச்சர் தலையிட்டு, சட்டவிரோதமாக பணிநீக்கம் செய்யப்பட்ட 56 தொழிலாளர்களை மீண்டும் பணியில் சேர்த்து அமைதியை நிலைநாட்ட நடவடிக்கை எடுக்குமாறு கேட்டுக்கொள்கிறேன்.